Mitem vollbepackte Rucksack isches am 24. September losgange Richtig Paris. Dä TGV hät eus i nur 5 Stund id Stadt vodä Liebi bracht. Eusi Unterkunft "the 3 Ducks" hämmer schnell gfunde und vo det us hämmer denn au grad es Spaziergängli zum Eiffelturm gmacht. Gseht scho no schön us, mit dene Liechtli ide Obigdämmerig :-) En Bsuech im Louvre isch natürli obligatorisch gsi und au de Champs Elysées hämmer en Bsuech abgstattet.
Scho bald isches eusi Reis wiitergange, und zwar nach Toronto. Vo det simmer miteme gmietete Auto in Norde gfahre und händ eus im Algonquin Park nach wilde Tier umeglueget. D'Natur isch unglaublich wiiiiiit und d'Wälder mit de Herbstfarbe eifach wunderschön. Aschlüssend hämmer eus uf de Weg zude Niagarafäll gmacht wo üs d'Fahrt uf de Maid of the Myst ä schöni Abchüehlig gäh hät. Wieder zrugg in Toronto simmer no es Baseball Game go luege, schono ä cools Feeling i some grosse Stadion.
Nach 2 erläbnisriiche Übernachtige simmer mitem Nachtbus Richtig New York gfahre. Das isch ja riiiiiesig und mir händ nur en chliine Teil gseh vo dere Grossstadt. Föteli vode Freiheitsstatue gmacht, de Usblick vom Empire State Building gnosse (..bi Näbel...) und es Rundfährtli mitem Sightseeing Bus unternoh, häjo was mä halt so macht als Tourist.
wiiteri Erzählige folged und natürli werded au bald Föteli online sii.
Keine Kommentare:
Kommentar veröffentlichen